රාමනුජන්ගේ අප්‍රකට දින සටහන් එකතුවක් පළ වෙයි

 ඡායාරූපය:

රාමනුජන්ගේ අප්‍රකට දින සටහන් එකතුවක් පළ වෙයි

ඉංග්‍රීසි සහ කන්නඩ යන භාෂා දෙකෙන්ම නිර්මාණකරණයේ යෙණු ප්‍රකට ඉන්දියානු කවියකු මෙන්ම විද්වතෙකු වූ ඒ.කේ. රාමනුජන්ගේ අප්‍රකට දින සටහන් එකතුවක් පසුගියදා පොතක් ලෙස ප්‍රකාශයට පත් වුණා. ඔහුගේ පුත්‍රයා වන ක්‍රිෂ්ණ රාමනුජන් සහ ඉන්දියානු ස්පාඤ්ඤ සංස්කෘතික සබඳතා ප්‍රවර්ධනයට සක්‍රියව දායකත්වය සපයන ගුයිලර්මෝ රොඩ්‍රිගුවේස් විසින් සංස්කරණය කරන ලද මේ කෘතිය පළ වී ඇත්තේ ‘ජර්නීස්: අ පොයෙට්ස් ඩයරි’ (Journeys: A Poet's Diary) යන නමින්. රාමනුජන්ගේ චාරිකා, ලිවීම පිළිබඳ ඔහුගේ අදහස්, වැඩිදියුණු කළ මෙන්ම මුල්කාලීනව ඔහු රචනා කළ කවි නිර්මාණවල කටු සටහන්ද මේ කෘතියට ඇතුළත්ව තිබෙනවා. ලේඛකයකු, කවියකු හා විද්වතෙකු ලෙස ඔහුගේ ගමන්මඟ සැකසුණු ආකාරය ගැන අවබෝධයක් ලබාගැනීමට මේ දින සටහන් එකතුව වැදගත් වන බවයි කෘතියට පෙරවදනක් සපයා ඇති රොඩ්‍රිගුවේස් සඳහන් කරන්නේ.

මයිසෝරයේ අංකුර කවියකු ලෙස 1940 ගණන්වලදී සිය සාහිත්‍ය චාරිකාවේ මුල් පියවර තැබූ රාමනුජන් 1950 ගණන්වලදී ඉන්දියාවේ ඉංග්‍රීසි සාහිත්‍යය පිළිබඳ මහාචාර්යවරයකු ලෙස කටයුතු කිරීමෙන් අනතුරුව 1959දී ෆුල්බ්‍රයිට් ශිෂ්‍යත්වයක් ලබා ඇමෙරිකාවට යෑම දක්වා ගත වූ කාලය තුළදී ඔහුගේ ජීවිතයේ වැදගත් කඩඉම් සලකුණු වූ ආකාරය ගැන දළ අදහසක් මේ කෘතියෙන් ලබාගත හැකියි.

චිකාගෝ විශ්වවිද්‍යාලයේ සේවයට බැඳෙන රාමනුජන් 1960 ගණන්වලදී සිය ප්‍රථම කාව්‍ය සංග්‍රහය සහ පරිවර්තන එකතුවක් පළ කරමින් ඉන් පසුව අඛණ්ඩව සාහිත්‍ය නිර්මාණකරණයේ යෙදුණු අයුරු මෙන්ම 1980 ගණන් සහ 1990 දශකයේ මුල් භාගය තුළදී පෞද්ගලික ජීවිතයට එල්ල වූ විවිධ බලපෑම් හේතුකොටගෙන ඔහුගේ කාව්‍යකරණය බිඳවැටුණු අයුරු ගැනත් කියැවෙන ඉඟි මේ කෘතියට ඇතුළත්ව තිබෙනවා.

පුරාණ සම්භාව්‍ය සාහිත්‍යයට අයත් ද්‍රවිඩ සහ මධ්‍යකාලීන කන්නඩ කාව්‍ය නිර්මාණවල මෙන්ම යූ.ආර්. අනන්ත මූර්තිගේ ‘සංස්කාර’ කෘතියේ ඔහු කළ පරිවර්තනය හැරුණු විට, ඔහුගේ සෙසු සාහිත්‍ය නිර්මාණ ගැන තවත් මෙවැනි දින සටහන් සහ ලිපි රාශියක් තවමත් අප්‍රකටව පවතින බවයි සඳහන් වන්නේ.

මාතෘකා