ගල්කඩපතන සහජීවනයෙන් ලොව දිනූ අපූරු ගමක්

 ඡායාරූපය:

ගල්කඩපතන සහජීවනයෙන් ලොව දිනූ අපූරු ගමක්

මෙරට කුඩා කඩ මණ්ඩි ආශ්‍රිතව බිහි වූ හන්දි අද වන වට සුවිසල් නගර, උපනගර මෙන්ම දියුණු වෙළෙඳපොළවල් බවට පත්ව ඇත. එසේම අතීත හෝ වර්තමාන සිදුවීම් නිසා ජනප්‍රියත්වයට මෙන්ම ප්‍රසිද්ධියට පත් හන්දිද බොහෝ දැකිය හැක. විවිධ ජාතීන් සාමූහිකව අත්වැල් බැඳ ජාත්‍යන්තරය ජය ගනිමින් සිටින, විවිධත්වයෙන් ලොව විචිත්‍රවත් කරමින් සිටින සොඳුරු ජන කොටසක් මූලික කරගත් අපූරු හන්දියක් ලෙස ගල්කඩපතන හන්දිය හැඳින්වීම අතිශයෝක්තියක් නොවේ.

වලපනේ ප්‍රාදේශිය ලේකම් කොට්ඨාසයට අයත්, අති සුන්දර ගම්මානයක් වන ගල්කඩපතන ගම්මනායට පිවිසීමට වලපනේ රූපහ මාර්ගයෙන්් සූරියගහපතන දක්වා ගමන් කළ යුතු අතර සූරියගහපතනින් දකුණට දිවෙන මාර්ගයේ කෙටි දුරක් ගමන් ගන්නා විට හමු වන කුඩා කඩ මණ්ඩිය ආශ්‍රිත සිවුමං හන්දිය ගල්කඩපතන හන්දියයි. කුඩා ත්‍රී රෝද රථ නැවතුම්පලක්, සිල්ලර බඩු හා අනෙකුත් අවශ්‍යතා සපුරා ගත හැකි කඩ කිහිපයක්ද සහිත හන්දිය ආසන්නයේම ශ්‍රී සුදර්ශනාරාම විහාරස්ථානයද පිහිටා ඇත. හන්දියේ සිට සිවු දෙසට ගල්කඩපතන ගම්මානය විහිද පවතී.

ගමට නම ලබුණු හැටි

ගල්කඩපතනට නම ලැබුණු අකාරය පිළිබඳව මත දෙකක් ගම්වාසීන් අතර පවතී. පසුගිය ශත වර්ෂයේ අවට ප්‍රදේශවල ජනයාගේ අවශ්‍යතා සදහා ගල් කඩන ලද පතන්බිම පසු කාලීනව ගල්කඩ පතන වූ බවට එක් මතයක් පවතින අතර, එකල ප්‍රදේශය පැතිර තිබූ ගවරා නම් තෘණ විශේෂය නිසා ගල්කඩපතන යන නම ලැබුණ බවටත් මතයක් පවතී. ඒ කෙසේ වෙතත් 1918-19 වකවානුවලදී මෙම හන්දිය ආශ්‍රිත ප්‍රදේශයේ අවට ගම්වාසින් පදිංචි වීමට පටන් ගැනීම නිසාම ගල්කඩපතන හන්දිය සහ ගම්මානය බිහි ව ඇත.

සිංහල -දෙමළ ඉස්කෝලෙ

අතීතයේ සිට අද දක්වාම ගල්කඩපතන වැසියෝ විවිධත්වයට මෙන්ම අන්‍යයන්ට ගරු කිරිමට පුරුදු පුහුණුව සිටිති. එයට අඩිතාලම වැඩි ඇත්තේ ඔවුන් ශිල්ප හැදෑරූ විදු පියසිනි. එදා සිට අද දක්වාම ගල්කඩපතන වැසියන් අකුරු කරන පාසල සූරියගහපතන විදුහලයි. එය කෙතරම් අපූරු පාසලක්දැයි එහි අකුරු කළ, හන්දිය ආසන්නයේ දිවි ගෙවන සූරසේන මහතා අපට පැවසුවේය.

"මම ඉස්කෝලෙ ගියේ සූරියගහපතනට. ඒක මිශ්‍ර පාසලක්. ඒ දවස්වල පහට විතරයි පන්ති තිබුණේ. සිංහල දෙමළ අපි ඔක්කොම ඒ ඉස්කොලේ එකට ඉගෙන ගත්තේ. සිංහල මාධ්‍ය ළමයින්ටත් දෙමළ මාධ්‍ය ළමයින්ටත් වෙන වෙනම හෝල් දෙකක් තිබුණා. අපේ ප්‍රින්සිපල් සිංහල. දෙවෙනියා දෙමළ. අපි සෙල්ලම් කළේ, තරගවලට ගියේ එකට. ඒ දවස්වල ඉඳලම අපි අතරේ කිසිම බෙදීමක් තිබුණේ නැහැ. ඒක හරි ලස්සන පුදුම ඉස්කෝලයක්. දැනුත් ඒ විදිහමයි. දෙගොල්ලොම එකට ඉගෙන ගන්නවා."

සන්දේ කඩේ

එදා අද මෙන් ගල්කඩපතන හන්දයේ කඩ සාප්පු නොතිබුණු අතර හන්දියට ආසන්නයේම ඇති සූරියගහපතනේ තිබූ "සන්දේකඩේ" සියල්ලන්ගෙම අවශ්‍යතා සපිරූ වෙළද සැලයි. "ඒ දවස්වල අඹලියද්දේ හිටපු අය තමයි ගල්කඩපතනට ඇවිත් පදිංචි වුණේ. 1962දි විතර තමයි ගමට පාර කැපුවේ. එත් එකක්ම තමයි හන්දියත් හැදුණේ. ඒ දවස්වල සූරියගහපතන තමයි ප්‍රදාන කඩවීදිය තිබුණේ. අනෙක් පහසුකම් ටිකත් තිබුණා. ඒ දවස්වල රූපහට බස් එකට සත පහයි." සූරසේන මහතා වැඩිදුරටත් පවසයි.

විවිධත්වයේ ආදර්ශය

පවුල් තුන්සිය හැට දෙකක් දිවි ගෙවන ගල්කඩපතන හන්දිය ආශ්‍රිත ගම්මනයේ සිංහල බහුතරයක් මෙන්ම හින්දු සහ ඉස්ලාම් භක්තිකයින් සැලකිය යුතුපිරිසක්ද දිවි ගෙවති. වලපනේ ප්‍රදේශීය ලේකම් කොට්ඨාසයේ වතු ආශ්‍රිතව ඇති විශාලතම වපසරියකින් යුත් ග්‍රාම නිලධාරි වසමද වන්නේ ගල්කඩපතනයි. එසෙම අද වන විට ගල්කඩපතන ගම්වාසීන් ජාත්‍යන්තර වෙළද පොළ ජයගැනීමට පවා සමත් වී සිටී.

පසුගිය තෙවසරක පමණ කාලයක් තුළ ගම්මානයේ විවිධත්වය, සංවර්ධනය සදහා මෙන්ම ජාත්‍යන්තරය ජයගැනීම සඳහාද යොදා ගැනීමේ පෙර ගමන්කරු වන්නේ මෙම ගම්මානයේ ග්‍රාම නිලධාරීවරයා වන චමින්ද කුෂාන්ත මහතායි.

රජයෙන් ලක්ෂ හැට දෙකක්

"මගේ උපන්ගම මේක. මම දැන් අවුරුදු තුනක් විතර අපේ ගමේ වැඩ කරනවා. අපේ ගමේ අය ඉස්සර ශුද්‍ර මූල්‍ය ණය උගුලට අහුවෛලා හිටියේ. දවසක් අපේ ප්‍රාදේශය ලේකම්තුමා කිව්වා ගම සංවර්ධනය කරන සැලැස්මක් ගැන. මම ඒ විදිහට අපේ ගම සැලසුම් කළා. ගමේ ඉන්න හැම ජාතියකම, හැම ආගමකම අය මේකට සම්බන්ධ කර ගත්තා. ගමේ කෝපි, මල්, බිම්මල් වගාවන් වගේම කිරි, මී මැසි පාලනය, පරිසර හිතකාමී බෑග් නිෂ්දානයත් පටන් ගත්තා. ජනාධිපතිතුමාගේ ග්‍රාම සංවර්ධන වැඩසටහනින් අපි අපේ ගමට ලක්ෂ හැට දෙකක් ඉල්ලුවා. අපි කිව්වා අපිට ඒ මුදල දුන්නොත් අපි අවුරුදු පහකින් ඒ ගාණ ලක්ෂ දෙසිය හැට දෙකක් කරනවා කියලා. ඒකට අපි ව්‍යාපෘති වර්තාවක් දුන්නා.

දැන් අපිට ඒ සල්ලි හම්බවෙලා තියෙන්නේ. අපි ආදර්ශ ගම්මානයක් විදිහට අපේ ගම සංවර්ධනය කරනවා. එකට දිසාපතිතුමාගේ ඉඳලා හැමෝම උදව් කරනවා. අපේ අරමුණ තමයි තව ටික කලකින් ලෝකයටම ආදර්ශයක් දෙන, උපරිම ආර්ථික සංවර්ධනයෙන් වගේම අනෙක් අංශවලිනුත් සංවර්ධනය වුණ ගමක් නිර්මාණය කරන එක. අපි ඔක්කොම අත්වැල් බැඳන් ඉන්න නිසා අපිට එක කරන්න පුළුවන් කියලා මම හිතනවා." ග්‍රාම නිලධාරිවරයා උද්යෝගිමත්ව පවසයි.

ගමට කිරි උතුරුවන සින්තාමරේ

ගල්කඩපතන හන්දිය ආසන්නයෙ දිවි ගෙවන සින්තාමරේ මහත්මිය, ගම්මනයේ කිරි ගොවි සමිතියේ ක්‍රියාකාරී සමාජිකාවකි. ඇය එම වැඩපිළිවෙළ ගැන මෙසේ විස්තර කළාය. "චන්දානි අක්කලාත්, විජේසිංහ අයියාලාත් එකක මමත් කිරි ගොවි සමිතියේ වැඩ කරනවා. මටත් කිරි දෙන්නු ඉන්නවා. අපි ගමෙන් දවසකට කිරි ලීටර් සීයක් විතර එකතු කරනවා. දැනට අපිට කිරි ශීත කරන්න වගේම යෝගට් කර්මාන්ත ශාලාවක් පටන් ගන්න ඔනේ මැෂින් ටික දීලා තියෙනවා. එත් ඒකට පොදු ඉඩමක් නැති ප්‍රශ්නේ තියෙන්නෙ. ගමේ ඉන්න හැමෝම වගේ සහෝදරයෝ වගේ එකට ඉන්නෙ, එකට වැඩ කරන්නෙ. ඒකයි අපේ ගමටත් කිරි උතුරනවා වගේ හරියන්නෙ."

රටට මී පැණි බෙදන සමන්

ගල්කඩපතන ගම්මානයේ මී මැසි පාලනයද ජයටම සිදු කරනු ලබන අතර ගම්මාන පුරා පවතින සොඳුරු පරිසරය මෙන්ම මලින් බර වූ ගස්වැල් මීමැස්සන්ට උචිත පරිසරයක් නිර්මාණය කරන්නට සමත්ව ඇත. "අපේ ගමේ මී මැසි ජනපද දෙසීයක් විතර තියෙනවා. අපි එකපාරකට මී පැණි බෝතල් දෙසිය හතළිහක් විතර ගන්නවා. අපෙන් තමයි ආයුර්වේදෙය මී පැණි ගෙනියන්නෙ. අපි පැණි බෝතලයක් රුපියල් දෙදාහට දෙන්නේ. මෙකට හොඳ ඉල්ලුමක් තියෙනවා. ගමේ හැම ගෙදරකම වගේ මී පෙට්ටියක් තියෙනවා." මී පැණි නිෂ්පාදනයේ නියුතු සමන් මහතා පවසයි.

ලොවට රස බෙදන රන් කෝපි

මෙම ගම්මානයේ සරුවට වැඩෙන කෝපි මේ වන විට ජපාන වැසියන්ගේ ප්‍රියතම පානයක් බවට පත්ව තිබේ. ඒ, මේ වන වට ගල්කඩපතන ගම්මානයේ නිෂ්පාදනය වන කොපි ගල්කඩපතන හන්දිය හරහා ජපානය දක්වා යන නිසාය. ජපානයේ කියෝතෝ සමාගමේ නියෝජිතයින් හා ගල්කඩපතන උඩරට රන් කෝපි නිෂ්පාදකයින්ගේ සංගමයේ ලෙකම්තුමිය ජනපති ඉදිරියේ ගිවිසුම් ගතවූයේ රන් කෝපි ජපානයට යවන්නටය. අවට ගම්මානවල මෙන්ම ගම්මානය අවට වතුකරයේ කෝපි පැළ ලක්ෂයක් සිටුවීම මොවුන්ගේ අභිප්‍රාය වී ඇති අතර මේ වන විටත් ඔවුන් කෝපි ජපානයට අපනයනය කරයි.

කෝපි ෆැක්ටරියට කඩය දෙයි

කෝපි මෙන්ම තවත් බොහෝ ධාන්‍යවර්ග මෙන්ම පළතුරු වර්ග විජලනය කළ හැකි, රුපියල් ලක්ෂ හතළිහකට වඩා වටිනා අති නවීන උපකරණ කට්ටලයක් මේ වන විට ගල්කඩපතන ගම්මානයට ලැබී ඇති අතර එය සවි කොට කර්මාන්ත ශාලාවක් වශයෙන් පවත්වාගෙන යෑමට තම කඩය පරිත්‍යාග කොට ඇත්තේ මෙම ගම්මානයේ වාසය කරනු ලබන මීරා සයිබු බදුර්දින් මහතා විසිනි. "අපේ පරම්පරාවේම අය ඉන්නේ මේ ගමේ. මම කෝපි වගාව වගේම මී මැසි පාලනය, මල්වගාව එහෙමත් කරනවා. මේ ගමේ මේ තියෙන සහෝදරත්වයට, එකමුතුකමට මම ගොඩාක් ආදරෙයි. ඒකයි කෝපි ෆැක්ටරිය දාන්න මගේ කඩේ දුන්නෙ. ඒ වගේම ගමේ සංවර්ධන ව්‍යාපෘති ගොඩාක් තියෙනවා ඒ හැම එකකටම අපි වගේම දෙමළ අයත් එකතු කරගෙන තියෙනවා. ඇත්තටම තව ටික කාලෙකින් මේ ගම ලෝකෙටම ආදර්ශයක් වෙනවා.

ලෝකයට ආදර්ශයක්

ගමේ ඉන්න හැමෝම ගමේ සංවර්ධනයට යොදාගෙන ගමට අවශ්‍ය සියලු දේ ගමේම නිෂ්පාදනය කර ගන්න එක තමයි අපේ අරමුණ එකට ගමේ ඉන්න හැම ජාතියකම, ආගමකම ඉන්න හැමෝම අපි දැනටමත් එකතු කරගෙන තියෙනවා. අපිට රජයෙන් ලොකු සහයෝගයක් ලැබෙනවා ඒ වැඩේ කරන්න.

අපි දැනට ගමේ ලක්ෂ හයසිය හැට දෙකක විතර වියදමින් පානීය ජල ව්‍යාපෘතියක් කරලා තියෙනවා. ඒ ව්‍යාපෘතියේ ජල ටැංකිවලට අවශ්‍ය ඉඩම් පවා පරිත්‍යාග කළේ ගමේ මිනිස්සු. මම හිතනවා අපිට බොහොම කෙටි කාලෙකින් ලෝකෙටම ආදර්ශක් දෙන්න පුළුවන් ගමක් අපිට නිර්මාණය කරන්න පුළුවන් වෙයි කියලා. ගම්මානයේ සංවර්ධන නිලධාරිනී නදීකා චාන්දනි රණසිංහ මහත්මිය පවසයි.

මේ වන විට ගල්කඩපතන හන්දියෙන් මහනුවර දක්වා බස් රථයක්ද ධාවනය වන අතර හන්දිය අවට මාර්ග පද්ධතිය තරමක් සංවර්ධනය වී ඇත. 2015 වසරේ ආරම්භ කරනලද මාර්ගසංවර්ධන ව්‍යාපෘතිය අතර මග නවතා දමා ඇති මුත් හන්දියෙන් ප්‍රවේශ වන ගම්මානයේ ඇත්තන් නම් තම සාමුහිකත්වයෙන් ලොවම ජය ගනිමින් සිටියි.

[චන්දන තිලක් ද සිල්වා]

මාතෘකා