කවුළුව

 ඡායාරූපය:

කවුළුව

ටෝල්කින්ගේ එංගලන්ත නිවස විකිණීමේ සූදානමක්

ලොව පුරා අතිශය ජනප්‍රිය වූ ‘ද ලෝර්ඩ් ඔෆ් ද රින්ග්ස්’ (The Lord of the Rings) කෘති මාලාව රචනා කළ සුප්‍රකට ඉංග්‍රීසි ලේඛක ජේ.ආර්.ආර්. ටොල්කින් දිගු කලක් ජීවත් වූ නිවෙස විකිණීමට සූදානමක් පවතින බව වාර්තා වෙනවා. එංගලන්තයේ ඔක්ස්ෆර්ඩ් නුවර පිහිටා ඇති, වර්ග අඩි 4000කින් සමන්විත මේ නිවෙසේ වටිනාකම ආසන්න වශයෙන් ඇමෙරිකානු ඩොලර් මිලියන 6ක් පමණ වන බව සඳහන්. විශාල කාමර 6කින් සහ අමුත්තන් පිළිගැනීම සඳහා විශේෂයෙන් වෙන් වූ කොටස් 2කින් මෙන්ම ගෙඋයනට විවෘත වන කොටස් තුනකින් සමන්විත කවුළු හා ද්විත්ව දොරවල් සහිත විසිත්ත කාමරයක් ඇතුළු විශේෂාංග රැසකින් සමන්විත මේ නිවෙස ඉදිකර ඇත්තේ 1924 වසරේදීයි. ටෝල්කින් 1930 සහ 1940 දශක පුරා දිගටම මේ නිවෙසේ රැඳී සිටිමින් විවිධ සාහිත්‍ය නිර්මාණ කටයුතුවල නියැලී තිබෙනවා.

ලොව පුරා විශාල පාඨක පිරිසකගේ අතිමහත් ඇගයීමට පාත්‍ර වූ ‘ද හොබිට්’ (The Hobbit) නමැති සම්භාව්‍ය කෘතිය මෙන්ම එයින් පසුව එහි අනුගාමී කෘති ත්‍රිත්වයක් ලෙස පළ වූ ‘ද ලෝර්ඩ් ඔෆ් ද රින්ග්ස්’ නමැති කෘති පෙළද ඔහු විසින් රචනා කරනු ලැබ ඇත්තේ මේ නිවෙසේදීයි. මුල්වරට 1937 සැප්තැම්බර් මාසයේ පළ වූ ‘ද හොබිට්’ කෘතියේ පිටපත් මිලියන 100කට අධික ප්‍රමාණයක් ලොව පුරා අලෙවි තිබෙනවා. එසේම 1954 නොවැම්බර් සහ 1955 ඔක්තෝබර් අතර කාල පරාසය තුළදී පළ වූ ‘ද ලෝර්ඩ් ඔෆ් ද රින්ග්ස්’ කෘති ත්‍රිත්වයේ පිටපත් මිලියන 150කට අධික ප්‍රමාණයක් මේ වන විට අලෙවි වී ඇතැයි සඳහන් වෙනවා. ඒ කෘති ත්‍රිත්වය දැවැන්ත නිෂ්පාදන පිරිවැයකින් යුතු හොලිවුඩ් සිනමා නිර්මාණ බවටද පත් වුණා. ඔක්ස්ෆර්ඩ් නුවර පිහිටි සිය නිවෙසට 1930 වසරේදී පැමිණි ටෝල්කින් එයින් පසු එළැඹි වසර 17ක කාලයක් අඛණ්ඩව එහි වාසය කර තිබෙනවා. ඒ කාලය තුළදී ඔහු සිය ලේඛන කටයුතුවල නියැලෙන අතරම මේ නිවෙස ආසන්නයේ පිහිටි ඔක්ස්ෆර්ඩ් විශ්වවිද්‍යාලයේ ඇන්ග්ලො-සැක්සන් සංස්කෘතිය හා භාෂාව පිළිබඳ මහාචාර්යවරයෙකු ලෙසද කටයුතු කළා. පසු කලෙක ඒ විශ්වවිද්‍යාලයේම ඉංග්‍රීසි භාෂාව හා සාහිත්‍යය පිළිබඳ මහාචාර්යවරයෙකු ලෙසද කටයුතු කළ ඔහු මියයන තුරුම වාසය කළේද මේ නිවෙසේ බවයි සඳහන් වන්නේ.

-------------

චීන ලේඛිකා ජුන් චෑන්ග්ගේ අලුත්ම නවකතාවටත් තහනමක්

ඓතිහාසික චරිත ඇසුරු කරගනිමින් සමකාලීන චීන සමාජය විවරණය කරන චීන සම්භවයක් සහිත බ්‍රිතාන්‍ය ලේඛිකාවක ලෙස ප්‍රකට ජුන් චෑන්ග් රචනා කළ අලුත්ම කෘතිය මේ මාසයේ ප්‍රකාශයට පත්වීමට නියමිතව ඇති නමුත්, ඇගේ සෙසු කෘති මෙන්ම මේ කෘතියත් චීන රජය විසින් පනවනු ලැබ ඇති තහනම් නියෝගයට යටත් වන බව සඳහන්. සිය පවුලේ චරිතාපදානය ලෙස රචනා කරන ලද ‘වයිල්ඩ් ස්වෝන්ස්’ (Wild Swans) නමැති කෘතියෙන්ම ලොව පුරා විශාල පාඨක පිරිසක් අතර ඉතා ජනප්‍රිය ලේඛිකාවක බවට පත් වූ ඇය රචනා කළ අලුත්ම කෘතිය පළ වන්නේ ‘බිග් සිස්ටර්, ලිට්ල් සිස්ටර්, රෙඩ් සිස්ටර්’ (Big Sister, Little Sister, Red Sister) යන නමින්. මිලියන 10කට අධික පිටපත් ප්‍රමාණයක් අලෙවි වී ඇති ඇගේ මුල්ම කෘතියද ඇතුළු සෙසු සියලු කෘති සඳහා පනවනු ලැබ ඇති තහනම් නියෝගය නිසා ඇගේ මේ අලුත් කෘතිය කියවීමේ හැකියාව චීනයේ විශාල පාඨක පිරිසකට නොලැබී යන තත්ත්වයක් උදාවී තිබෙනවා.

ඇගේ කෘති මෙසේ තහනමට ලක් කරනු ලැබ ඇත්තේ ඒවායෙන් නූතන චීනය පිළිබඳව ඉදිරිපත් කෙරෙන ඇතැම් කරුණු මඟින් චීනයේ ප්‍රතිරූපයට හානි සිදු වන නිසා බවයි සඳහන් වන්නේ. විශේෂයෙන්ම මෙයට පෙර ඇය කොමියුනිස්ට් පක්ෂ නායක හා චීනයේ මහජන සමූහාණ්ඩුවේ නිර්මාතෘ මාඕ සේතුං චරිතය පාදක කරගනිමින් රචනා කළ ‘මාඕ: දි අන්නෝව්න් ස්ටෝරි’ (Mao: The Unknown Story) සහ 19 වැනි සියවස අවසානයේදී චීන රජය පාලනය කළ අධිරාජිනියකගේ චරිතය පාදක කරගනිමින් රචනා කළ ‘එම්ප්‍රස් ඩොවාගර් සික්සි’ (Empress Dowager Cixi) නමැති කෘති ඔස්සේ ඉදිරිපත් කරන ලද ඇතැම් කරුණු මඟින් චීන රජය බලවත් අපහසුතාවට පත්ව තිබුණා. දේශපාලන චරිත පාදක කරගනිමින් රචනා කෙරෙන පොත් සහ චරිතාපදාන කෙරෙහි දැඩි ප්‍රතිපත්තියක් අනුගමනය කරන චීන රජය එවැනි ප්‍රකාශන ආනයනය කරන හෝ බෙදාහරින සෑම අයෙකුටම දැඩි දඬුවම් පමුණුවනවා. එහි අරමුණ වී ඇත්තේ චීනයේ බීජිං නගරය විසින් මවාපෙන්වනු ලබන නිල ඉතිහාසය පිළිබඳ ප්‍රශ්න මතුවීම වළකා ගැනීමයි. එහෙත් මේ වන විට ලවුත්-මෑන් ජොන් හැලිඩේ නමැති සිය සැමියාද සමඟ බ්‍රිතාන්‍යයේ ජීවත් වන 67 හැවිරිදි ජුන් චෑන්ග් ලේඛනගත සාක්ෂ්‍ය මත පදනම්ව ඒ නිල ඉතිහාසය දැඩි අභියෝගයට ලක් කරමින් සිය කෘති රචනා කරනවා. ඒ නිසාම චීනය ඇයට තහනම් රටක් බවට පත්ව තිබෙනවා. චීනයට පැමිණීම ඇයට සපුරා තහනම් කරනු ලැබ ඇති අතර, සිය වියපත් මව බැලීම සඳහා වසරකට සති දෙකක කාලයකට පමණක් චීනයට පැමිණ ආපසු යෑමට ඇයට අවසර ලැබෙනවා.

----------

රොමේෂ් ගුණසේකරගේ අලුත්ම නවකතාව නොවැම්බර්යේ එයි

ලොව ඉහළම සාහිත්‍ය සම්මානයක් වන මෑන් බුකර් ත්‍යාගයට නිර්දේශ ලැබූ ශ්‍රී ලාංකික සම්භවයක් සහිත බ්‍රිතාන්‍ය ලේඛක රොමේෂ් ගුණසේකර රචනා කළ අලුත්ම නවකතාව ‘සන්කැචර්’ (Suncatcher) නමින් නිකුත් කිරීමට සියලු කටයුතු සූදානම් බව බ්ලූම්ස්බරි ප්‍රකාශන සමාගම පවසනවා. දශක කිහිපයකට පෙර 1960 ගණන්වල ශ්‍රී ලංකාවේ පැවැති සමාජ දේශපාලන පසුබිම ඇසුරු කර ගනිමින් කයිරෝ නමැති කුඩා දරුවෙකු වටා ගොඩනඟන ලද කතා පුවතක් රැගත් මේ කෘතිය එළඹෙන නොවැම්බර් මාසයේදී වෙළෙඳපොළට නිකුත් කිරීමට අපේක්ෂා කරන බව ඔවුන් පවසනවා. රටේ හටගන්නා නොසන්සුන්සහගත සමාජ දේශපාලන පසුබිම හමුවේ පාසල් වැසීයෑම, පාලන තන්ත්‍රය දුර්වල වීම, පුවත්පත් මාධ්‍ය ආයතන වෙත තර්ජන එල්ල වීම සහ ආගමික අයිතිවාසිකම් අර්බුදයට ලක්වීම වැනි විවිධ ගැටලු ඔස්සේ ලංකාවේ ජනජීවිතය ඉදිරියට ගමන් කළ ආකාරය මේ නවකතාවෙන් කියැවෙන බවයි ඔවුන් වැඩිදුරටත් පවසන්නේ.

රොමේෂ් ගුණසේකර මෙයට පෙර ප්‍රබන්ධ කෘති අටක් රචනා කර ඇති අතර, ඒවා විවිධ භාෂා ගණනාවකට පරිවර්තනය වී තිබෙනවා. ඉතාලියේ ‘ප්‍රෙමියෝ මොන්ඩෙලෝ’ (Premio Mondello) ඇතුළු සාහිත්‍ය සම්මාන රැසකින් පිදුම් ලබා ඇති ඔහු රචනා කළ ‘රීෆ්’ (Reef) නවකතාව 1994 වසරේදී මෑන් බුකර් ත්‍යාගය සඳහා නිර්දේශ ලැබුවා. ඔහු රචනා කළ ‘ද සෑන්ඩ්ග්ලාස්’ (Sandglass) සහ ‘ද මැච්’ (The Match) වැනි නවකතාත් ඉහළ පාඨක විචාරක අවධානයට ලක් වුණා. ‘මොන්ක්ෆිෂ් මූන්’ (Monkfish Moon) නමින් පළ වූ ඔහුගේ ප්‍රථම කෙටිකතා සංග්‍රහයත් නිව්යෝර්ක් ටයිම්ස් වැනි ජාත්‍යන්තර පුවත්පත් හා සඟරා රැසක ඉහළම ඇගයීමට ලක් වූ කෘතියක් ලෙස පිළිගැනීම හිමිකර ගත්තා. ඉදිරියේදී පළ වීමට නියමිත කෘතියට පෙර ඔහු රචනා කළ ‘නූන්ටයිඩ් ටෝල්’ (Noontide Toll) නමැති කෘතිය මෑත කාලය තුළ ශ්‍රී ලංකාවේ පශ්චාත් යුද සමය පිළිබඳව ඉංග්‍රීසි බසින් ලියැවුණු ඉතා විශිෂ්ට ප්‍රබන්ධ කෘතියක් ලෙස ඇගයීමට පාත්‍ර රවුණා.

[මේනුක විතාන]
 

News Order: 
7
මාතෘකා