මගෙ තාත්තා ධනවාදයේ අනුග්‍රාහකයෙක්

 ඡායාරූපය:

මගෙ තාත්තා ධනවාදයේ අනුග්‍රාහකයෙක්

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමු වී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්, චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

අද දින මා කටයුතු කරන්නේ වෙනත් කෙනකුගේ දුවක් වෙනුවෙනි. මා උදවු කරමින් සිටින්නේ මා ඕටය. ඇයගේ නම තා ඕය. උපසභාපති ලියුගේ මුල් කසාදයේ දුවය. සිය පියාගේ දික්කසාදය නුරුස්සන ඇයට කුඩම්මා සමඟද හොඳින් සිටිය නොහෙයි. තා ඕ බලන්ට යන මම දිවාභෝජනය සඳහා ඇය කැඳවාගෙන එමි. මා ඕවාදිනියක වන්නට මම ඇයට අවස්ථාව සලසා දෙමි. ඇයට සාවධානව සවන් දෙන මම ඇගේ අදහස් උදහස් මෙහෙයවමි. ඇයට බියකින් තොරව නිදහසේ තමා ගැන කතා කළ හැකි වාතාවරණයක් නිර්මාණය කරමි.

මං හිතන්නෙ මගෙ තාත්තා ධනවාදයේ අනුග්‍රාහකයෙක් කියල දැරිය කතාව ආරම්භ කරයි.

ඔව් තා ඕ, මා ඕ ජියෑන් චින් මැතිනිය සෙමෙන් හිස පහත් කරයි. ඔයාට ලැබිය යුතු සාධාරණය - යුක්තිය - ඔයාට ලැබෙමින් තියෙනව. ඔයාගෙ ස්වරය තද කරන්ඩ. ඔයාගෙ යෙදුම කප්පාදු කරන්ඩ. ‘මං හිතනව’ කියන කෑල්ල අයින් කරන්ඩ. කියන්ඩ මගේ තාත්තා ධනවාදයේ අනුග්‍රාහකයෙක් කියල. ඒක පැහැදිලිවම කියන්ඩ. ඔයාගෙ අම්මව අතහැරල දාන්ඩ කුඩම්මා කටයුතු කළ ආකාරය ගැන ටිකක් හිතන්ඩකො. ඇඳේදි ඔයාගෙ අම්මට තිබුණු තැන කුඩම්මා ලබාගත්තු ආකාරය ගැන හිතන්ඩකො. ළමයෙක් හැටියට ඔයා විඳපු දුක - වේදනාව - ගැන හිතන්ඩකො. ඔයාගෙ දුක් කන්දරාවට වැන් ගුවාන් මෙයිට වන්දි ගෙවන්ඩ වෙනව. අඬන්න එපා තා ඕ. ඔයාගෙ වේදනාව මට තේරෙනව. මගෙ දරුවො මේ ඔයාගෙ ජියෑන් චින් නැන්දා කතා කරන්නෙ. මා ඕ මාමා ඔයා පිටිපස්සෙ ඉන්නව. මං ඔයාට කියන්නම්කො අගෝස්තු 5 වැනිදා මා ඕ තමන්ගෙම දැවැන්ත චරිත පෝස්ටරය එළියට දමල තියෙනව. ඒකෙ සිරස්තලය ”මූලස්ථානයට බෝම්බ ගහන්ඩ” මට විශ්වාසයි. ඔයා දන්නව එයා කාටද බෝම්බ ගහන්ඩ කියල කියන්නෙ. එහෙම නේද? ඒ ඔයාගෙ තාත්තා බේරාගන්ඩ. එයා පයින් ගහල ඉතිහාසයෙන් එළියට ඇදල දැමීමෙන් බේරාගන්ඩ. ඔයාල එයාට උදවු කරන්ඩ ඕනෑ. මා ඕ මාමයි මායි දෙන්නම දන්නව ඔයා ඔයාගෙ තාත්තයි කුඩම්මයි එක්ක එකඟ නොවන බව. ඔයා ලියු පවුලෙන් එළියට දමාපු චණ්ඩාලියක්. මේක තමයි ඔයාට හැබෑම විප්ලවවාදිනියක් හැටියට ස්ථාවර වෙන්ඩ තියෙන අවස්ථාව. තා ඕ, වෙන කවුරුවත් ඔයා වෙනුවෙන් කතා කරන්නෙ නෑ. ඒක ඔයාම කරන්ඩ ඕනෑ. ඔයාගෙ අන්ධකාර ජීවිතේ ආලෝකය දල්වාගන්ඩ දරුවො. දැන් එන්ඩ ඔයාගෙ අදහස් ලියන්ඩ ලියලා ඒක හෙට රැලියෙදි කියවන්ඩ.

සිය කතාව අවසන් කළ දැරිය වෙවුලන්ට වන්නීය. කතාවේ සිරස ”යක්ෂයාගේ ආත්මය - මගේ තාත්තා වන ලියු ෂා ඕ - ක්විට චෝදනා ඉදිරිපත් කිරීම. ” කතාවේ ගැම්ම - බලපෑම - අතිමහත්ය. සියල්ල යටකරගෙන යන්නේය. ලියුගේ දූෂණ පිළිබඳ කථාන්තරය, එක රැයෙකින්ම අස්සක් මුල්ලක් නෑර පැතිර යන්නේය. ඕපාදූපවලින් වර්ණවත් වුණු හිතලුවලින් ගිනි තියන ලද අතිදුෂ්ට කතාන්තරය කනින් කනට ගොස් සතර දිග් භාගයේම විහිද යයි. ලේ උරාබොන්නකු හැටියට ලියු හඳුන්වා දෙමින් අඳින ලද කාටූන් චිත්‍ර මුළු චීනය පුරාම බිත්තිවලත් ගොඩනැඟිලි මතත් දක්නට ලැබෙයි. මේ යුවළ තොටිල්ලේ නැළවුණු දවස්වල සිටම දේශද්‍රෝහීන්ද බටහිර ඒජන්තවරුන්ද වී සිටි වග විස්තර වශයෙන් දැක්වෙයි.

අගෝස්තු 25. කුවායි ඩා-ෆු රතු මුරකා භටයන් පන්දහසකට නායකත්වය දෙමින් ඉදිරි කාලයේදී සිදු වන්ට නියමිත ලියුවරුන්ගේ නඩු විභාගයට අදාළ පත්‍රිකා පතුරුවා හැරීමේ කාරියෙහි නිතරව සිටියි. තියානමෙන් චතුරස්‍රය හරහා පෙළපාළියේ යන කුවායි ඩා-ෆු ශබ්ද විකාශන උපකරණයකින් කෑගසා කියන්ට වෙයි. බිම දමනු, විනාශ කරනු, තම්බනු, බදිනු, ලියු ශා ඕ ක්වි සහ එයාගෙ සහායක ඩෙන් සියා ඕ- පින්...

මම බීජින්හි කම්කරුවන්ගේ ක්‍රීඩා භූමියේ ඇති හරිත කාමරයේ හිඳගෙන සිටිමි. චතුරස්‍රය හතළිස්දහසක් වන රතු මුරකා භටයන්ගෙන්ද ශිෂ්‍යයින්ගෙන් කම්කරුවන්ගෙන් හා ගොවීන්ගෙන්ද පිරී ඇත්තේය. මා පැමිණ ඇත්තේ මගේ බලය පරීක්ෂා කර බැලීමටය. කුවායි ඩා-ෆු පිරිසේ ප්‍රීති ඝෝෂා මෙහෙයවමින් ඉදිරියේම සිටියි. පිරිස අතරින් නැඟී එන හඬ කන් බිහිරි කරවන තරම්ය.

කුවායි ඩා-ෆු විසින් කොංග්‍රසයේත් දේශපාලන මණ්ඩලයේත් සාමාජිකයන් පනහකට වැඩි පිරිසක් ප්‍රාණ ඇපකරුවන් හැටියට ගෙන ඇත්තේය. ඔවුන් අතර බීජින්හි නගරාධිපති සංස්කෘති බියුරෝවේ ප්‍රධානියා සහ හිටපු ජාතික ආරක්ෂක ඇමතිවරයා වන ලූ ඕ රෙයි - කින්ද වෙති. ඔවුන් මට ගරු කළ යුතු නැතැයිද කිසියම් වැරදි වැටහීමකදී තමන්ගේ භක්තිවන්තභාවය හේතුකොටගෙන මා ඕ විසින් තමන් බේරාගනු ඇතැයිද සිතන පිරිසකි. හොඳයි, අපි බලමුකො.

ලූ ඕ රෙයි - කින් කියන්නේ පොහොර කූඩයකි. ඔහුගේ කකුල කැඩිලාය. අත්අඩංගුවට ගනිද්දී ගොඩනැඟිල්ලකින් බිමට පැණීමෙන් තමා අත්අඩංගුවට ගැනීම පිළිබඳව ඔහු විරෝධය දක්වා ඇත. දැන් රතු මුරකා භටයන් දෙදෙනකු විසින් ඔහු ඒරියාකඳක ඔසවාගෙන යනු ලැබෙති. ඔහු හරියට වෙළෙඳාම්පොළට ගෙන යනු ලබන එළුවකු වැනිය. පිරිස අතරින් නැඟෙන විශාල සිනා හඬක් මා ඕ ජියෑන් චින් මැතිනියට ඇසෙයි. තාවකාලිකව අටවා ගන්නා ලද වේදිකාව මත ඇගේ විරුද්ධවාදීහු පෙළගසා ඇත්තාහ. ඔවුන්ගේ දෑත් පිටිපසට කර මාංචු දමා ඇත. කුවාඩි ඩා-ෆු ඔවුන් එකිනෙකාගේ නම් ලියූ මොට්ට කැප් තොප්පි, එකිනෙකාගේ හිස් මත දමයි. ඒ හැම නමක්ම වැක්කෙරන කළු තීන්තෙන් කපා දමා ඇත්තේය. මේ අතරවාරයේ පිරිස විසින් මා ඕගේ ඉගැන්වීම් පාඨ ගායනා කරනු ලබයි. ”විප්ලවය කියන්නේ රාත්‍රී භෝජන සංග්‍රහයක් නොවේ. විප්ලවය කියන්නේ ප්‍රචණ්ඩත්වයයි.”

කුවායි ඩා-ෆුගේ ජයග්‍රහණ සම්බන්ධයෙන් මා ඕ සතුටට පත්ව සිටින බැව් ඇය ඔහුට පවසයි. මේ මිනිසුන්ට හිංසා කරන්ට මා ඕට අවශ්‍ය බැව් ඇය කියා නැති නමුදු කුවායි ඩා-ෆු කරන්නේ මා ඕ කැමති විය හැකි දේවල්ය.

මමත් කුවායි ඩා-ෆු සමඟ එක් වී සටන් පාඨ කියමි. ”මා ඕගේ ඉගැන්වීම් අහස දෙදරවන ගිනි කඳු පුපුරුවා හරින සාගර පත් දෙකට පලන ගිගුරුම් හඬකි. මා ඕගේ ඉගැන්වීම සත්‍යයි.”

පාලනයේ රහස දකින්ට මා ඕ මට අවස්ථාව සලසා දී ඇත. මාර්ෂල් පෙන් ඩි-හුවායි යනු ජනරජය පිහිටුවීමේදී ප්‍රධාන භූමිකාවක් ඉටු කළ පක්ෂපාතී තැනැත්තෙකි. ඒකෙන් අදහස් වෙන්නෙ නෑ, පෙන් මිනීමරුවකු බවට පත්වෙන්නෙ නැත කියල මා ඕ මට පැවසීය. භාවික වශයෙන් අවස්ථානුරූපීව වෙනස්වීම හේතු කොටගෙනය මා ඕ මේ අවුරුදු ගණනක් තුළම ආරක්ෂා වී සිටින්නේ. ඔහු පසුතැවෙනු කිසිම අවස්ථාවක මා දැක නැත. හදවතක් නැතිකම තමන්ට ගෙවන්ට සිදුව ඇති මිල බැව් ඔහු හොඳාකාර ප්‍රත්‍යක්ෂ කොට ඇත්තේය.

ඇය රැස්ව සිටි පිරිස වසඟයට ගන්නීය. ඇගේ අණසක යටතේ ලක්ෂ පහක් වන රතු මුරකා භට සේනාවකි. ඔවුහු සොල්දාදුවන්ට වඩා බලවත් වන්නාහ. ඔවුන් නිදහස්කාමීය. නිර්මාණශීලීය. රැස්වීම පැය හතරක් පුරා පවතියි. එය අවසන් වන්නේ ඒ මිනිසුන් අවඥාවට ලක් කිරීමෙනි. ඔවුන්ට පහර දීමෙනි. හිතුවක්කාර ලූ ඕට කකුල් දෙකම අහිමි වෙලාය.

අපි සතුරන් අවසන් මායිමට එළවන තුරු නවත්වන්ඩ එපා හරිත කාමරයේ සිට මා ඕ මැතිනිය සන්නියක් හැදුණු කලෙක මෙන් උමතු ලෙසින් කෑගසන්නීය. ඇය එක විටම උද්යෝගයට මෙන්ම භීතියටද පත්ව සිටියි. ඇගේ සතුරන් විසින් ”මා ඕගෙ ගෑනි ඒකිගෙ ඇඳේදිම අවසන් කරන” බවට බරපතළ දූසමාන ආරංචි පැතිරෙමින් තිබෙතැයි කෑන් ෂෙන් ඇයට පවසා ඇත. එහි මූලය හමුදාව තෙක්ම දිවෙන බැව් කෑන් ෂෙන් විසින් සොයාගෙන ඇත. මා ඕ මැතිනිය වඩාත් සන්ත්‍රාසයට පත් වන්නේ එහෙයිනි. මාර්ෂල් යේ ජියෑන් යින්, චෙන් යී සූ, සියෑන් කියෑන් සහ නී රොන්-සෙන් ආදී කොට ඇති ”පරණ කොල්ලන්” උපජනාධිපති ලියුගේ සමීපතම මිතුරන්ය. මා ඕගේ රැවටිලිකාර හැසිරීම ගැන ඔවුහු කලකිරීමට පත්ව සිටිති. මේ කෝපය කොතරම් බරපතළද යත් බීජින් ඇත්තේ දුම් දමන වාතාවරණයකය. ”මරනු” යන වචනය වා තලය මත රැව් දෙන්නේය. අධිරාජ්‍යයකුගේ සුදුසු නැති අනියම් භාර්යාව ගොදුරට ගැනීම සම්ප්‍රදාය වන්නේය. ඇය මරනවා යනු අධිරාජ්‍යයාට පාඩමක් ඉගැන්වීමකි. ටෑන් අධිරාජයාත් යෑන් නමැති අනියම් භාර්යාවත් පිළිබඳ ෙප්‍ර්ම කථාන්තරය හොඳම නිදසුනයි. යුද ප්‍රධානීන් අතර ඇති සම්බන්ධතාව සුවපත් කිරීමේදී සනාථ වුණු හොඳම විධිය නම් ගැහැනිය මරා දැමීමයි.

පරිවර්තනය | ඩබ්ලියු. ඒ. අබේසිංහ

මාතෘකා