සැරිසරන පෙම්වතා ඔහුය

 ඡායාරූපය:

සැරිසරන පෙම්වතා ඔහුය

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

පරිවර්තනය | ඩබ්ලියු. ඒ. අබේසිංහ

නවීන ගැහැනියක වීමේ අරුත කිමැයි ටෑන් නාහ්, ලෑන් පින්ට කියා දෙයි. ශිෂ්ටත්වය - සංස්කෘතිය සොයා ඇය යා යුත්තේ ඒ මඟෙහිය. ෂැන්හයිවරුන්ගේත් සාමාන්‍ය චීනුන්ගේත් වෙනස නම් එයයි. ෂැන්හයි කාන්තාවන්ගේ ආත්ම විශ්වාසයත් ශෝභනත්වයත් එන්නේ එතැනිනි. අභ්‍යන්තර වැසියන් හා සසඳා බලන විට ෂැන්හයිවරුන්ට ජීවිතය පිළිබඳ ඇත්තේ මැදහත් ආකල්පයකි. නිදසුනක් හැටියට ඔවුහු විදේශ සංස්කෘතිය අගය කරති. එහෙත් කිසි විටෙක එයට යටපත් නොවෙති. ටෑන් නාහ්, ලෑන් පින්ට කියා සිටින්නේ ෂැන්හයි සමාජයේ පහළම පන්තිය වන රික්ෂෝකාරයන්ට සවන් දෙන ලෙසය. ඔවුන්ගේ ප්‍රාදේශීය බස් වහර තුළත් ඉංගිරිසි යෙදුම් මතු වන්නේ ඉබේටමය.

වේළපු ඌරු මස් රසවත් වන්නේ දුම් ගැහීම නිසාය. මං කියන දේ තේරෙනවද, මිස් ලෑන් පින්?

ඔහු ඉදිරියෙන් ගමන් කරයි. ඇය ඔහු පසුපස යයි. අ ඩොල්ස් හවුස් නාට්‍යයේ ඉංගිරිසි පිටපත කියවන්නට ඔහු ඇයට උගන්වයි. දැනටමත් එහි චීන පරිවර්තනය දන්නා හෙයින් ඇයට මේ කාරිය පහසු වෙතැයිද ප්‍රියජනක වෙතැයිද ඔහු කල්පනා කරයි. ඔහු කියවූ පසුව ඇය ඔහු පුනරුච්චාරණය කරයි. එතෙකුදු සිය ශබ්දෝච්චාරණයෙන් මිදෙන්ට ඇයට අසීරුය. ඇය සතුව ඇත්තේ ෂාන් ඩොන් ස්වරයකි. හරියට දරදඬුය. ටෑන් නාහ් තමා දන්නා තරම් වෑයම් කරන්නේ වී නමුදු ඇය තවමත් එක්ස් (X) අක්ෂරය උසුරුවන්නේ ආයි-කෝ-ෂිහ් කියාය. වී (V) අක්ෂරය උසුරුවන්නේ වෙයි කියාය. ටෑන් නාහ් බලාපොරොත්තු සුන්කර ගනියි. හැම පැත්තෙන්ම ඔහු වෑයම් කරයි. ඔහු හපන් නොවේදැයි ඇය කල්පනා කරන්නීය. ටිකක් හිතට අරගෙන පාඩම් කරන්නැයි ඔහු ඇගෙන් අයදියි. ඔහු කරන්නේ බල්ලෙකුට මීයකු අල්ලන්ට ඉගැන්වීම වැනි වැඩකැයි ඇය ඔහුට පවසයි.

ඇය හැම රැයකම ඉංගිරිසි ඉගෙනගන්ට ඔහුගේ නිවසට යන්නීය. කදිම අසල්වාසියකු ඔහු ජීවත් වන්නේ කාමර දෙකක් ඇති වාසස්ථානයකය. ජනේල අසල පැළෑටිද වවාගෙන ඔහු ජීවත් වන්නේ පිළිවෙළකටය. ඔහුගේ කාමරය තුළ පරසිදු පුද්ගලයන්ගෙන් ලැබුණු සිහිවටන රැසකි. පේළි කිහිපයක් කියවූ පසුව ඇයට එපා වෙයි. එවිට ඔහු ඇයට හාදුවක් දී තව ටිකක් දරාගෙන ඉන්නැයි අයදියි. ඇය ඔහු සමඟ හුරතල් වන්නේ, දඟකාර දැරියක මෙනි. ඔහුගේ අවධානය කැඩෙයි. ඔහු හුන් තැනින් නැඟිට යයි. ඔහු ඇයට අක්ෂර නිවැරදි කිරීමේ අභ්‍යාසයක් දෙයි. හැම විටම එය පටන් ගන්නේ L-O-V-E කියාය. ඇය හැම විටම කියන්නේ ලොවෙයී (L-O-Wei-E) යනුවෙනි. ඔහු හිස කසයි. ඇය මත වැතිරෙන ඔහු ඇගේ තොල්පෙති දෙක අතර සිය ඇඟිල්ල රුවාගෙන V අකුර ශබ්ද කරද්දී ඒ ඇඟිල්ල විකන්නැයි උපදෙස් දෙයි.

ඔහු හොඳ පෙම්වතෙකි. ඇය අත්පත් කරගන්ට ඔහුට කිසි හදිස්සියක් නැත. ඇය පිටතට කැන්දන් යන හෙතෙම ඇයට නිස්කලංකව සිටින්ට අවස්ථාව සලසා දෙයි. කලාභවන් පෞරාණික භාණ්ඩ සාප්පු, පොත්හල්, විවිධ ප්‍රසංග, පද්‍ය ගායනා යන මේ හැම තැන්වලටම ඔහු ඇය එක්කන් යයි. නගරයේ ගොඩනැඟිලිවල කවුළු අද්දරින් ගමන් කරද්දී ඔවුන් දෙදෙනා එතුළින් දිස්වන තමන්ගේ ප්‍රතිබිම්බ දෙස බලති. දෙදෙනා කඩවසම් යුවළකි. දෙදෙනාම උසය. හීන්දෑරිය.

ඇය කරන වැරදිවලට ඔහු කිසි විටෙකත් උරණ නොවෙයි; විහිළු නොකරයි. ඔහු සම්බන්ධයෙන් ඇය අගය කරන කාරණයකි එය. ඇතැම් විට තමාගේ දක්ෂතාව ඕනෑවට වඩා පෙන්වන්ට යන බව ඇය දන්නීය. ඒ අසීරුව ඇයට දැනෙන එවන් අවස්ථාවක ඔහු කරන්නේ හුන් තැනින් නැඟිට යාමයි. එම පිළිවෙළද ඇගේ අගය කිරීමට ලක් වන කාරණයකි. සෙසු අයවළුන් විවේචනය කරන ටෑන් නාහ් ඇය සම්බන්ධයෙන් එසේ නොකරයි. ඔයා සූ ඩොන්ග් පෝ ගැනවත් දන්නේ නෑනෙ. මොන තරම් නරක තත්ත්වයක්ද? ඇයට ඔහු එවැනි වදනක් කිසි විටෙක පවසන්නේ නැත. සූ කියන්නේ ඉතා ප්‍රසිද්ධ පැරණි කවියකු බැව් ඉවසිලිවන්තව ඇයට පහදා දෙන ඔහු අනතුරුව ඒ කවියාගේ කවිද කියා දෙන්ට වෙයි. ඉනික්බිතිව සූ ඩොන්ග් පෝගේ උපන් ස්ථානය බලන්ට යනු සඳහා ටිකට් පත් මිල දී ගන්නා ඔහු මඟ දිගට කවියා ගැන දේශනයක් කරයි.

සුදු පැහැති පව් කුළු පන්තිය සිතිජය මතින් ඉහළට නැඟෙමින් සිටියි. කඳු පත්ල දෙසට වේගයෙන් ගලා බසින යැන්සී ගංගාව දිවෙන්නේ නැ‍ඟෙනහිර දෙස බලාය. පර්වත පන්තිය වටා එතෙමින් උඩට දිවෙන පටු පාරකි. එමඟ ඇත්තේ කඳු සිරසට නඟින්නටය. මම ඒ දර්ශනයෙන් මුසපත් වෙමි. කඳු පාමුල දැවයෙන් තැනුණු කුලියට ගත හැකි බෝට්ටුවක් ඇත. මසුන් අල්ලන මිනිහෙක්ද එතැන සිටියි. ඉහළ බලාගෙන අප බෝට්ටුවේ හිඳගන්නා අතර පර්වත පන්තිය විසින් මගේ පෙණහලු තෙරපන බවක් දැනෙන්ට වෙයි. නිලට නිලේ බබළන පැහැදිලි අහස අභිරමණීය දර්ශනයකි. මද්දහන වන විට අපි පව් පෙළ මතට නැ‍ඟී සිටිමු. උඩ සිට විහඟ බැල්මෙන් පහත බලන විට බෝට්ටුව පෙනෙන්නේ කුහුඹුවකු තරම් පුංචිවටය. විශාලත්වයත් ක්ෂුද්‍රභාවයත් අතර මේ වෙනස සම කර බලන විට දිවි ගමනේ පරිමාණයත් ගාම්භීරත්වයත් පිළිබඳ හැඟීමක් මට දැනෙන්ට වෙයි.

මා ටෑන් නාහ් සමඟ ෙප්‍ර්මයෙන් බැඳුණේ මේ ආකාරයටය. මම හැම දෙයක්ම ඔහුගේ දෑසින් බලන්ට පටන්ගනිමි. සූ ඩොන්ග් පෝගේ කතාන්තරය සමඟ අරඹන නව ලෝකයක්. ටෑන් නාහ් පැරණි රාජ සභාව සහ සුගේ ගැටුම වර්තමාන ආණ්ඩුව සමඟ සමකරන්ට වෑයම් කරයි. අඩොල්ස් හවුස් නාට්‍ය දර්ශනය වසා දමන්ට බල කළ හැටි. ඒ භූමිකාව මගෙන් පැහැර ගත් ආකාරය.

මාතෘකා