අත අතනොහරින ප්‍රේමයේ ගිනිසිළුව

 ඡායාරූපය:

අත අතනොහරින ප්‍රේමයේ ගිනිසිළුව

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

උදේ පහන් වන විට කලින් දින රැයේ ලැබූ ආස්වාදය නැවත ඉල්ලා සිටි විට, ඇය එය ප්‍රතික්ෂේප කරන්නීය. ඇය සිට ඇත්තේ අවදියෙනි. මුළු රැයම ඇය කල්පනා කරමින් සිට ඇත්තේ සී-ෂෙන් ගැනය. මනසේ තිබුණු අරගලය සිරුරටද දැනෙන්ට වී ඇත්තේය.

ඔබට තියෙන්නේ අවුරුදු දහතුනක තරම් දැරියකගේ අත්. ඔහු මෘදු ලෙස ඇය ස්පර්ශ කරයි. ඒ තරම් සිහින් අත් පා තියෙන ගෑනියකුට මේ තරම් පිරුණු ළැමක් තියෙන එක පුදුමයට කාරණයක්.

ඇගේ දෑසෙහි කඳුළුය.

ඇගේ දුක තේරුම් ගැනීමට තමාට ඉඩක් දෙන්නැයි ඔහු ඉල්ලා සිටියි.

එය අපහසු බැව්, ඇය පවසයි.

ඉගෙනගන්ට මට තියෙන අයිතිය කාටවත් ගන්ඩ බෑ. ඔහු ඇගේ කඳුළු පිසලමින් කියයි.

මටයි අධ්‍යාපනයක් අවශ්‍ය. ඇය අනිත් පැත්තට හැරෙයි. ඔබ පවුලක් ඉන්න, කසාද බැඳපු මිනිහෙක්. මම මේ අවුලට පැටලෙන්ඩ...

ඔබ මාව අතහැරල යන්නෙ නැහැ ලෑන් පින්.

නමුත් සී-ෂෙන් ජීවතුන් අතර,

ඇය දෙස හැරී බලන ඔහු දුෂ්ට සිතින් සිනාසෙයි.

මට සී-ෂෙන්ට මේක කරන්ඩ බෑ, ඇය කියාගෙන යයි. එයා මට කිසි වරදක් කරලා නෑ.

පුදුමයකට මෙන්, ඒ පේළිය ඇයට අමතකව ඇති නාට්‍යයකිනි. එතැන හිටි චරිතය වෙනුවට සී-ෂෙන් නම යොදාගත්තා පමණි. ඇය සිය ඇඳුම් ඇඳගෙන ඇඳෙන් බසින්නීය. ඇයගේ ඇත් දළ පැහැති සම දෙස බලා සිටිනු ඔහුට අසීරුය. එයින් ඔහුගේ සිත ගිනි ගන්ට පටන් ගනියි. එසැණෙහිම ඔහුට ඇති වන හැඟීම නම් ඇය ඔහුගේ තරුණ ජෙනරාල්වරයකුගේ මනාලිය වන්ට යන බවය. නැතිනම්, ඇය ආපසු ෂැන්හයි නුවරට යන බවය.

ඔහු ඇය වෙත ළං වෙයි. නිහඬවම ඇය සිය පහස ලබන්ට ඔහුට ඉඩ දෙයි.

මඳ වේලාවකින් පසුව ඔහු එය අත හරියි. ඔහු අනිත් පැත්තට හැරෙයි. ඔහුගේ මුහුණ සීලිම දෙසට යොමුව ඇත. යන්ඩ... මං අත ඇරල යන්ඩ..

සිය ඇඳුම්වල බොත්තම් දමන අතර ඇගේ කඳුළු රූරා හැළෙයි. මට වෙන පාරක් පේන්නෙම නෑ. මට අනියම් භාර්යාවක් වෙන්ඩ බෑ.

ඔහු ඇය දෙස බලාගෙනය. ඔහුගේ හක්කේ දත් ඇඹරෙනු ඇයට ඇසෙයි.

ගෙබිම මත බිත්තිය ළඟ මීයෙක් මතු වෙයි. ඌ ඉදිරියට ඇවිත් ගෙබිම හරහා ගොස් අනතුරුව ඇඳ ළඟට වී නවතියි. උගේ හිස ඔසොවා බෝංචි ඇට බඳු උගේ ඇස්වලින් මේ යුවළ දෙස බලාගෙන සිටියි.

හිරුගේ රැස් ගෙබිමට උඩින් පැන යයි.

දීර්ඝ ප්‍රයාණයෙන් පස්සෙත් මට ජීවත් වෙන්ඩ පුළුවන් වුණා නම්, නැති වන ඕනෑම දෙයක් දරාගෙන ඉන්ඩ මට පුළුවනි, ඔහු මැසිවිලි කියන්ට වෙයි. හැම යුද්දෙකම තුවාලකාරයො ඉන්නව. මං ඇති තරම් ලේ දැකල නැද්ද? ඔබට ඕනෑ දෙයක් කරන්ඩ. නමුත් කරුණාකරල මට පොරොන්දු වෙන්ඩ ආයෙත් ආපහු එන්නෙ නෑ කියල.

ඇය ඉකිගසන්ට වන්නීය. ඒ හැඬුම නවතාගන්ට ඇයට බැරිය.

අපි මේ අවුල දිහා මෙහෙම බලමු. ඔබ කියන්නෙ මම කසාද බැඳපු මිනිහෙක් කියල. ඒකෙ තේරුම මම ඉරණමට ගොදුරු වෙලා ඉන්න මිනිහෙක් කියල. ඇයි ඔබ මට වෙඩි තියන්නෙ නැත්තෙ? ඔබේ ඔය උදාසීනත්වයෙන් මාව මරල දාන්ඩ.

හොඳම ඉන්ද්‍රජාලිකයා යනු තමාගේ සූත්තරය අනෙකාට පැහැදිලි කර දුන් පසුවද ඒ විජ්ජාව විශ්වාස කරවන්ඩ සමත් මිනිහාය.... ඔහු දෙස බලන්ට ඇය හිස ඔසොවන්නීය. මේ මොහොතේ මා සිටින්නේ මෙතැනය. මම තාමත් හිතන්නෙ ඔබ ඉන්නෙ මා සඳහා කියල.

එහෙනම් කියන්ඩ මාව අතහැරල යන්නෙ නෑ කියල.

නමුත් මං යන්ඩ ඕනෑ. අනේ දෙවියනේ මට ඔබ අතහැරල යන්ඩ ඕනෑ.

සපත්තු දමා ගන්නා ඔහු ඇඳෙන් ඉවතට යයි.

ඇය දෙපා ඔසවන්ට වැයම් කරයි. එහෙත් සිය දෙපා බර වැඩි බැව් ඇයට දැනෙයි.

මොකද තමුසෙට වෙලා තියෙන්නෙ? ඔහු කෑගසන්ට වෙයි. උඹ බයගුල්ලෙක්ද? මං බයගුල්ලන්ට වෛර කරනව. මං කියන දේ ඇහෙන්නෙ නැද්ද? මම වෛර කරනවා, වෛර කරනවා, බයගුල්ලන්ට.. දැන් පලයන් යන්ඩ. මගෙ නියෝගෙට කීකරු වෙයන්. පලයන්... පලයන්... මාව අතඇරල පලයන්.. යෙනාන් අත ඇරල පලයන්. එළියට බැහැපන්.

ඇය දොර ළඟට යන්නීය. දොරේ අගුල ඇගේ අතට දැනෙයි. තමා පිටුපසින් ඔහු විලාප කියනු ඇයට ඇසෙයි. යුද්ධය ඇවිත් හැම දෙයක්ම මගෙන් උදුරාගත්තා. මගෙ බිරිය මගෙ දරුවො..... වරින් වර මගේ හදවතට වෙඩි වැදුණා. බොහොම වතාවක්. හදවතේ හැදුණු සිදුරු බොහොමයි. ඒවා ආයෙත් අලුත්වැඩියා කරන්ඩ බෑ. ලෑන් පින්ල උඹ මිනිහෙකුගෙ මිනී පෙට්ටිය හදන අතරවාර ඒ මිනිහට ජින්සෙන් සුප් දෙන්නෙ ඇයි?

මම ආපසු මගේ ඒකකයට පැමිණ සිටිමි. ඊළඟ දවසේ අපට පැවරෙන්නේ සවෝමන්බාන්ය. ඒ කියන්නේ යෙනාන්හි නූගත්කම ”පිසදාලන” කණ්ඩායමකි. මම චීන බසත් ගණිතයක් උගන්වමි. මගේ ශිෂ්‍යයන් පැමිණ ඇත්තේ දියුණු කාන්තා පාබල හමුදා කණ්ඩායමකිනි. ඔවුන් අතර පක්ෂයේ ඉහළ තත්ත්වයේ නිලධාරීන්ගේ බිරින්දෑවරුද සිටිති. ඔවුන්ගේ වෙඩි තැබීමේ පුහුණුකාරිය වශයෙන් කටයුතු කර ඇත්තේ සී-ෂෙන් බැව් දැනගන්ට මට වැඩි කලක් ගත වන්නේ නැත.

වැඩිහිටි කාන්තාවක් පැමිණ මගේ අතේ මැණික්කටුව වැරෙන් අල්ලාගනියි. සී-ෂෙන් මෙහෙමයි, පුහුණු වෙන්ඩ කැමති, ඇය පවසයි. ඒක නොවෙයි ලෑන් පින් සහෝදරිය, සී-ෂෙන් කියන්නෙ අතිදක්ෂ ගෑනියෙක්. තමා පුහුණු වෙන ආකාරය පෙන්නන්ඩ කියල එයා මාව එක්කන් යනව. එයා කැමති රාත්‍රි කාලෙදි පුහුණු වෙන්ඩ තමයි. විශේෂයෙන් හඳ නැති කාලෙදි. යාර සියයක් විතර ඈතින් ගිනිහුලු දහයක් පත්තු කරනව. පත්තු කරල පිස්තෝල දෙකෙන්ම වෙඩි තියනව. වෙඩි උණ්ඩ දහයයි. ගිනිහුලු දහයම නිවිල. ඊට පස්සෙ මට කියනව තවත් ගිනිහුලු ගණනක් පත්තු කරන්ඩ කියල. ඊට පස්සෙ ආයෙත්....... ආයෙත්....

පරිවර්තනය | ඩබ්ලියු. ඒ. අබේසිංහ

මාතෘකා