මම ඒ දේශනයට ආදරෙයි ඒ මිනිහාට ආදරෙයි...

 ඡායාරූපය:

මම ඒ දේශනයට ආදරෙයි ඒ මිනිහාට ආදරෙයි...

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්, චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

ඔහුගේ ශරීර රාමුවේ ලෝහ ඇතැයි ඇයට සිතෙයි. කෑන් ෂෙන්ගේ අවවාදයෙහි කිසියම් සත්‍යයක් තිබේදැයි ඇයට හදිසියේම මතක් වෙයි. යෙනාන්වල දී කෙනකු සම්බන්ධයෙන් වැදගත්ම කාරණය තමයි, කොමියුනිස්ට්වාදියකු හැටියට එයාගෙ පසුබිම. ඇයට ඉවෙන් මෙන් වැටහෙන්නේ වෙනත් සත්‍යයකි. ඒ නම්, පිරිමින්ගේත් ගැහැනුන්ගේත් ස්වභාවය පිළිබඳ සත්‍යයකි. අමුතුවෙන් ඔප්පු කරන්ට කියා දෙයක් ඇත්තේ නැත. හැම දෙයක්ම ඇත්තේ ඔවුන්ගේ සිරුරු තුළය. මනුෂ්‍ය සත්ත්වයාගේ දෑස්වලින් ග්‍රහණය කරගන්නා කාරණා තුළ.

වේදිකාව මත සිටින මිනිහා තවදුරටත් කතා කරගෙන යයි. වචන, යෙදුම් සහ සංකල්ප ගලාගෙන එයි.

මේ සිද්ධාන්තවාදියො පෙන්නාගෙන ඉන්නෙ තමන් සැබෑ විප්ලවවාදීන් කියල. ඔවුන් අපේ කොන්ග්‍රස් මණ්ඩලයෙ වැදගත් ආසනවල ඉඳගෙන ඉන්නව. ඔවුන් කරන දෙයක් ඇත්තෙ නෑ. ජෝශප් ස්ටාලින් කියන දේ ගිරවුන් වාගෙ කියවනවා විතරයි. කැරැල්ලත් ප්‍රහාරයත් දෙකම හටගෙන තියෙන්නෙ ඇතුළතින්. අපේම පක්ෂය ඇතුළෙන්. ඒවා අදෘශ්‍යමානයි. නමුත් මාරාන්තිකයි. ඒ අය කියන්නෙ තමුන් සියයට සියයක්ම සෝවියට්වරු කියල. නමුත් ඒ අය දිරාපු නූල් තියෙන මකුලුවො විතරයි. ඔවුන්ට තවදුරටත් නූල් වියන්ඩ බෑ. ඒ අයගෙන් විප්ලවයට ඵලක් ඇත්තෙ නෑ. ඔවුන් කතා කරන්නෙ කාල් මාක්ස්ගෙ තාලයෙන්. නමුත් ඔවුන් උදවු කරන්නෙ චියන් කායි-ෂෙක්ට. අප විහිළුවට ලක් කරලා. අපට දීලා තියෙන්නෙ සීරුණු වීදුරු සහිත ඇස් කණ්ණාඩි. ඒවායින් අපට පැහැදිලිව බලන්ඩ බෑ. අපි ස්ටාලින් විශ්වාස කළා. ඔහු එවාපු මිනිසුන් කෙරෙහි විශ්වාසය තැබුවා. නමුත්, අපේ වියදමට බැර වෙන්ඩ සමාජ අත්හදා බැලීම් කරනවා හැරෙන්ට ඔවුන් වෙන මොනවද කරන්නෙ?

මා ඕ පවත්නා තත්ත්වය ආශ්‍රයෙන් චීන ඉතිහාසය විග්‍රහ කර දක්වන්ට වෙයි. ඔහු න්‍යායයන් ඉදිරිපත් කරන්නේ මිලිටරි සැලසුම්ද සහිතවය. ඉනික්බිතිව ඔහුගේ ස්වරූපය වෙනස් වෙයි. ඔහු සන්සුන් ප්‍රකෘතියකට වැටී සිටියි. තමා ඉදිරියෙහි සිටි පිරිස අතුරුදන් වූ කලෙක මෙනි. තරුණිය ඔහු මැන බලන්ට වන්නීය. හරියට සාස්තර කියන්නකුගේ දෑසින් මෙන් ඇය මේ මිනිහාගේ අනාගතය මැන බලන්ට පටන්ගනියි. ඇය ඔහුගේ මුහුණෙහි සමීප දර්ශනයක් ගනියි. ඔහුගේ මුහුණ මත සිංහ අඬුවක මුද්‍රාවක් ඇය දකියි. සිංහයා ගොරවන ශබ්දය ඇයට ඇසෙයි. කෑ මොර ගසන හඬකි. තමාත් තම භූමිකාවත් අතර ටික් ගාන සිහින් හඬක් නැ‍ඟෙනු ඇයට ඇසෙන්ට වන්නේ ඒ මොහොතේදීය.

තේ ජෝගුවක්ද රැගෙන පෞද්ගලික ආරක්ෂකයා පැමිණෙයි. මේ කොලුවාගේ ඇහිබැමි දෙක අතර දළඹුවකුගේ වැනි කැළලකි. ඔහු ස්වකීය හාම්පුතාගේ දෙපා මුල තේ ජෝගුව තබයි. මෙයින් තරුණිය මවිතයට පත්වන්නීය. යෙනාන්හි දී තේ ජෝගුවක් මේසයක් මතින් අතට ගන්නවාට වඩා එය බිම මතින් ගැනීම සුපුරුදු කාරියකි.

වේදිකාව මත සිට ඇසෙන කටහඬ ඝෝෂාකාරී වෙයි.

සහෝදරවරුනි, සත්‍යය නම් අපි පරාජයට පත් වෙමින් සිටිනවා කියන කාරණයයි. අපේ මිනිස්සු, අශ්වයො, පවුල්වල සාමාජිකයො මේ සියලු දෙනාම අපට අහිමි වෙමිනුයි තියෙන්නෙ. අපට අනුගමනය කරන්ට බල කරල තියෙන උපදෙස් හේතුකොටගෙන අපේ සිතියම ඇකිලෙන්ට පටන් අරගෙන. අපි ඇති තරම් පාඩම් ඉගෙනගෙන නැද්ද? අපගේ සටන් පැරදුණේ චියන් කායි -ෂෙක්ට නෙමෙයි. ජපනුන්ට නෙමෙයි. ඇතුළෙ ඉන්න අපේම සතුරන්ට. අපේ සහෝදරවරුන්ගෙ ඔළුගෙඩි, පර්වත වාගෙ පෙරළිලා යනව. දේශපාලන අවිහිංසාව ආරක්ෂා කිරීමේ දී ඔව්.. අපි එය ආරක්ෂා කරන්ට ඕනෑ තමයි. නමුත් එසේ කළ යුත්තෙ අවිද්‍යාවෙන් නෙමෙයි දැනීමත් ප්‍රඥාවත් පෙරදැරි කරගෙනයි. අපේ නායකත්වය කොතරම් දුර්වල වෙලාද කියනව නම් අපි ඉන්නෙ අවාසනාවට ඇලිලා. සීතල වතුර බොන කොට අපේ දත් ගැලවිලා වැටෙනවා. අපි අධෝවාතය පිට කරන කොට හැප්පිලා බිම ඇද වැටෙනව. අපි අපේම මිනීවළවල් දෙසට යන ගමන නතර කරන්ඩ ඕනෑ. සහෝදරවරුනි, බූරුවන්ගෙ බෙටිවලින් සොසේජ් හදන්ඩ බැරි බව ඔබ හැම දෙනාම තේරුම්ගත යුතුයි.

ඔහු බිමට නැමී ජෝගුව අතට ගෙන තේ උගුරක් බොයි.

පැන්සල්වලින් කඩදාසි සීරෙන හඬ ඇයට ඇසෙයි.

පිරිස - ෆෙයාලින්ද ඇතුළු පිරිස - මා ඕගේ කතාව ලියා ගනිමින් සිටිති.

තරුණිය කිසිවක් ලියාගන්නේ නැත. ඇය මා ඕ කියූ සහ නොකියූ පේළි කටපාඩම් කරගන්නීය. ඇය තමාගේ හැකියාව ක්‍රියාවට නඟන්නේ එතැනදීය.

ඔහු කතාව නවත්වයි. තේ උගුරක් බොයි. පිරිස තමන්ගේ සටහන් පොත්වලින් හිස ඔසවන තුරු බලා හිඳියි. ඔහුට මුද්‍රණ යන්ත්‍රයක් නැත. ප්‍රවෘත්ති පත්තරයක් නැත. ඔහු විශ්වාසය තබන්නේ මිනිසුන්ගේ කටවල් කෙරෙහිය. ඔහුගේ දෑස මුළු ශාලාව පුරාම දිවෙයි. හදිසියේම ඔහු ඉදිරියෙහි බලාපොරොත්තු නොවුණු දර්ශනයකි. ඔහුගේ එල්ලයට බාධාවකි. ඔහු ඇය හඳුනා ගනියි. අන් අය මෙන් සටහන් නොලියා ගන්නා තරුණිය ඔහු හඳුනා ගනියි. වෙස් ගැන්වීම පිසදාගත් නිළිය. එහි සංඝට්ටනය අන්ධකාරය තුළින් මතු වේගන එන අරුණාලෝකය වගේය. එහි මිහිරි වේදනාව ඔහු තුළටම කාවදියි.

නිදා සිටි බීජයක් පුපුරා අංකුරයක් මතු වෙයි.

ඔහුගේ එල්ලය වෙනස් කෙළේ තමා විසිනැයි වටහා ගන්නා ඇය ඉවත බලන්නීය. දැන් ඔහුගේ අවධානය ඇය කෙරේය. ඇය කෙරේම පමණකි. එය සිදු වන්නේ පූර්ණ නිහැඬියාව තුළය. රහසේම පෙති දිග හැරෙන වනකපුරු මලෙක සුවඳ හිරු රැස විසින් වැලඳගනු ලබයි. තරුණිය, එය අත්විඳියි. ඇයට සන්සුන්බවක් - ශාන්තියක් - දැනෙන්ට වෙයි. ඇය සිටින්නී ඇගේ භූමිකාවේය. ඒ මොහොත ග්‍රහණය කරගන්නා ඇය එය දීප්තියෙන් බබළවන්ට වැයම් කරන්නීය. තමා ගැනම සතුටක් ඇයට දැනෙයි. ස්වකීය පේ‍්‍රක්ෂක සමූහයා ඇද බැඳගන්ට ඔවුන්ගේ ආකර්ෂණයට ලක් වන්ට හැමවිටම සමත්කම් පෑ නිළිය. හදවත තුළ ගැහෙන හැම ගැස්මක්ම ඇයට දැනෙයි. නිහැඬියාව තුළ ගැලෙමින් ඕ, ඔහුට තමා හඳුන්වා දෙන්නීය. ඇගේ සිරුරේ හැම අංශුවක්ම කතා කරන්ට පටන්ගෙනය. ක්‍රියාත්මක වන්ට පටන්ගෙනය. ඇවැසි තැනට ළඟා වන්ට පටන්ගෙනය. නිදහස් ලෙසද නිර්භය ලෙසද ඔහු තමා දෙස බලා සිටිනු ඇය දකියි. පිරිසිදුවට මොනවට පීරන ලද ඇගේ කෙස් කලඹ ඇත් දළ පැහැ සම, යෙනාන් භූමිය මත ඇය නිශ්චලව හිඳගෙනය. තමා සොයාගන්ට ඇය ඔහුට ඉඩහැර බලාසිටින්නීය.

ඔහු සිනාසෙයි. ඇය ඔහු දෙසට හැරෙන්නීය. එවිට ඇගේ දෑස ඔහු පසුකරගෙනද තව බොහෝ ඈතටද දිවෙන්නේය. එකිනෙක ස්පර්ශයකට ඇය ඔහුට ඉඩ නොදෙයි. තවම නැත ගින්න දල්වනු සඳහා ඇය ඔහු පසු කරගෙන යයි. ඔහු ග්‍රහණයට ගන්ට ඔහු තමා පසුපස ලුහුබඳවාලන්ට.

ඔපෙරාවේ ගායන වෘන්ද සියල්ලම ඇයගේ හිස තුළ ගලා යෙයි. රත් පැහැ මල් සුණුවලින් සමනල තටු බරව ඇත්තේය. ඇයට ෆෙයාලින්ගේ කටහඬ ඇසෙන්ට වෙයි. ඇය මහ හඬින් කෑ ගසයි. අතිවිශිෂ්ටයි - මම ඒ දේශනයට ආදරෙයි - ඒ මිනිහාට ආදරෙයි...

පරිවර්තනය | ඩබ්ලියු. ඒ. අබේසිංහ

මාතෘකා