බ්ලූමැන්ඩල් සංඛ 22 වැනිදා දක්වා යළි රක්ෂිත බන්ධනාගාරයට

 ඡායාරූපය:

බ්ලූමැන්ඩල් සංඛ 22 වැනිදා දක්වා යළි රක්ෂිත බන්ධනාගාරයට

බ්ලූමැන්ඩල් සංඛ නමැත්තා ලබන 22 වැනිදා දක්වා තවදුරටත් රිමාන්ඩ් බාරයේ තැබීමට කොළඹ මහේස්ත්‍රාත් අධිකරණය අද (08) නියෝග කළේය.

මිනිස් ඝාතනයක් සම්බන්ධයෙන් සැකපිට අත්අඩංගුවට ගැනීමට නියමිතව සිටි පාතාල කල්ලි නායකයෙකු බව කියන මෙම රණසිංහ ආරච්චිගේ සංඛ හෙවත් බ්ලූමැන්ඩල් සංඛ නමැත්තා ඉකුත්දා සිය නීතිඥවරු මාර්ගයෙන් කොළඹ අතිරේක මහේස්ත්‍රාත් කාංචනා ද සිල්වා මහත්මිය හමුවේ බාරවීමෙන් පසුව රිමාන්ඩ් බාරයට පත් කිරීමට මහෙස්ත්‍රාත්වරිය නියම කර තිබිණි. පැමිණිල්ල අද (08) කැඳවූ අවස්ථාවේදී කොළඹ අපරාධ කොට්ඨාශය අධිකරණයට දන්වා සිටියේ මෙම සිද්ධිය පිළිබඳව තවදුරටත් පරීක්ෂණ සිදුකරන බවයි.

ඉන් අනතුරුව මහේස්ත්‍රාත්වරිය විසින් සැකකරු ලබන 22 වැනිදා දක්වා රිමාන්ඩ් බාරයේ තැබීමට නියම කර ඇත. 2018 වසරේ දෙසැම්බර් මස 26 වැනිදා මට්ටක්කුලිය, හේනමුල්ල ප්‍රදේශයේදී දිනේෂ් එරංග නැමැති අයෙකු ඝාතනය කිරීම සම්බන්ධයෙන් සැකපිට බ්ලූමැන්ඩල් සංඛ නැමැත්තා අත්අඩංගුවට ගැනීම සඳහා පොලීසිය විසින් පරීක්ෂණ කටයුතු ආරම්භ කර තිබිණි.