හොරෙන් රැකියා කළ චීන ජාතිකයන් 14කට සිර දඬුවම්

හොරෙන් රැකියා කළ චීන ජාතිකයන් 14කට සිර දඬුවම්

සංචාරක විසාවලින් පැමිණ නීති විරෝධි ලෙස මෙරට රැඳී සිටිමින් රැකියාවල නිරත වූ චීන ජාතිකයින් 14 දෙනෙකුට ගාල්ල මහාධිකරණයේදී එක් වසරක් බැගින් අනිවාර්ය සිර දඬුවමක් සහ රුපියල් පනස් දහස බැගින් දඩයක් නියම කෙරිණි.

ඔවුන් ඊයේ (14) අධිකරණයට ඉදිරිපත් කළ අවස්ථාවේ ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා මෙම දඬුවම් නියම කළේය.

දඩය නොගෙවන්නේ නම් තවත් මාසයක සිර දඩුවමක්ද විත්තිකරුවන්ට නියම විය.

මෙම චීන ජාතිකයින් සංචාරක විසාවලින් පැමිණ ගාල්ල දඩල්ලේ ගොඩනැගිලි ඉදිකිරීමේ වැඩ බිමක අත් උදව්කරුවන් ලෙස සේවයේ යෙදී සිටියදී ලැබුණ තොරතුරක් මත ගාල්ල පොලිසිය මගින් පසුගිය (2) වන දින අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කර තිබිණ.

[ෆර්හාන් නිසාම්දින්]

මාතෘකා