ස්විට්සර්ලන්තය සමඟ විදුලිබල ක්ෂේත්‍රයේ ආයෝජන අවස්ථා

 ඡායාරූපය:

ස්විට්සර්ලන්තය සමඟ විදුලිබල ක්ෂේත්‍රයේ ආයෝජන අවස්ථා

ස්විට්සර්ලන්තය හා ශ්‍රී ලංකාව අතර මිත්‍ර සබදතා තවදුරටත් තහවුරු කරමින් ලංකාව තුළ විදුලිබල ක්ෂේත්‍රයේ ආයෝජන අවස්ථා පිළිබඳව සිය රටේ අවධානය යොමුකරවීමට කටයුතු කරන බව අමාත්‍ය රවී කරුණානායක මහතා පවසයි. අමාත්‍යවරයා මේ බව ප්‍රකාශ කළේ ස්විස්ටර්ලන්තයේ තානාපති Hunspeter Mock මහතා හමු වී සාකච්ජා පැවැත්වූ අවස්ථාවේදීයි.

විශේෂයෙන්ම මේ වනවිට සමස්ත දිවයින පුරා සාර්ථකව ක්‍රියාත්මක වන සූර්යබල සංග්‍රාමය ව්‍යාපෘතිය පිළිබඳවත් ඊට අදාළව ක්‍රියාත්මක කෙරෙන නෙට් ප්ලස්’ සහ ‘නෙට් මීටරින්’ ක්‍රමවේදයන් පිළිබඳවත් ස්විට්සර්ලන්ත තානාපතිවරයාගේ විශේෂ අවධානය යොමුවිය. ඒවා ක්‍රියාත්මක ආකාරය හා පාරිභෝගිකයාට මෙන්ම ආයතනයක් ලෙස ලංකා විදුලිබල මණ්ඩලයට අත්වන ප්‍රතිලාභයන් ගැනද වැඩිදුරටත් තානාපතිවරයා, විෂයභාර අමාත්‍යවරයාගෙන් කරුණු විමසීය. ශ්‍රී ලංකාව මේ වනවිට පුනර්ජනනීය බලශක්ති ප්‍රභවයන් වෙත නැඹුරු වෙමින් සිටින බව පැවසූ අමාත්‍යවරයා කියා සිටියේ සූර්ය, සුළං ආදි පුනර්ජනනීය ප්‍රභවයන් තුළින් ශ්‍රී ලංකාව සැලකිය යුතු මට්ටමකට පැමිණ ඇති බවයි.  

විශේෂයෙන්ම දිවයින තුළ ක්‍රියාත්මක වන සූර්යබල සංග්‍රාමය මේ වනවිට ප්‍රශස්ත මට්ටමකට පැමිණ ඇති බවත් එම ව්‍යාපෘතිය වර්ධනය කිරීමට කටයුතු කරන බවත් පැවසීය. තානාපතිවරයා අවධාරණය කළේ විදුලිය සැපයීම අතින් කලාපයේ සෙසු රටවලට වඩා ඉදිරියෙන් ලංකාව සිටින බවයි. ලංකාව වැනි සංවර්ධනය වන රටක් ජනතාවගේ යටිතල පහසුකම් පිළිබඳව මේ අයුරින් විශේෂ අවධානයක් යොමුකිරීම රජයක් වශයෙන් සිදුකරනු ලබන විශිෂ්ට ක්‍රියාවක් බවත් ඒ තුළින් රටක් වශයෙන් නැගී සිටීමට සහ සංවර්ධනාත්මක මාවතකට අවතීර්ණ වීමට පහසු බවත්ය. එමෙන්ම ශ්‍රී ලංකාව මේ වනවිට අනුගමනය කරනු ලබන සූර්ය සහ සුළංබල විදුලි උත්පාදනය කෙරෙහි තම විශේෂ අවධානයක් යොමු වූ බවත් පැවසීය.